Føroya Triathlon Felag

Triathlon, úrslit frá FM í Triathlon 2010, OL teinurin 

Føroyameistarakapping í Triathlon var sunnudagin 16. mai. Hesi ferð var kappast um FM heitið á sokallaða OL teininum, ið er 1,5 km svimjing, 40 km súkkling og 10 km renning. Í góðveðrinum komu 7 íðkarar til start, 5 í elitubólkinum og 2 í unglinga/nýbyrjarabólkinum. Ikki óvæntað var tað Guðmundur Joensen, ið legði seg á odda longu í svimjingini, og økti hann eisini um leisluna bæði í súkklingini og renningini, og kom á mál sum tryggur vinnari. Kappingin um annaðplássið stóð millum Gunnar Dahl Olsen og Andrass Joensen. Andrass var fyrri á súkkluni, men bleiv skjótt heintaður av Gunnari, sum tó valdi ikki at fullføra kappingina, tí hann vildi spara sær knøini, ið ofta arga hann í renningini. Andrass kundi tí tryggur renna á mál sum nr. 2. Evald Rasmussen kom á mál sum nr. 3, hóast hann datt á súkkluni og misti eitt sindur av tíð. Fimti maðurin í kappingini, Aksal Haraldsen, steðgaði eisini aftan á súkklingina. Hann hevði somu trupulleikar sum Gunnar. Hjá unglingunum var tað Jóannis Albert Nielsen, ið vann 1/12 triathlonkappingina. Hetta er aðru ferð at hann er við í slíkari kapping, og sigast kann, at tað gekst honum væl, hann betraði tíðina við heili 5 min. og munnu vit ikki fara at síggja meira til hann í framtíðini. Hin unglingurin, Tórbjørn Haraldsen, kom ongantíð veruliga í gongd. Hann svímaði beint sum hann var liðugur at svimja, og valdi tí at steðga.

Eftir ætlan skuldi 2. etapa av H&G Cup 2010 koyrast leygardagin 1. mai. Kappingin verður ístaðin flutt til á Vestanstevnu, tá Tórshavnar Súkklufelag og Føroya Triathlon Felag í felag eisini ætla at skipa fyri barnasúkkling í samband við stevnuna.

Úrslit frá FM 2010 í Sprint Triathlon

Sunnudagin 18 apríl skipaði Føroya Triathlon Felag fyri Føroyameistaraheiti í Sprint-triathlon í Havn. Sprint-triathlon er uml. 1/8 av einum fullum Ironman t.v.s. 750 m svimjing, 20 km súkkling og 5 km renning. Svomið var í Svimjihøllini, síðani súkklað tríggjar ferðir frá Svimjihøllini til rundkoyringina við Skansan og aftur, og so oman til Skógrøkt Landsins. Har bleiv skift til renning, og runnið 6 ferðir ein tein upp á 965 m, tvs. 5,8 km.Gunnar Dahl-Olsen var fyrstur á svimjiteininum, men Andrass Joensen og Eli Christiansen vóru í hølunum á honum. Eitt sindur aftanfyri komu Evald Rasmussen, Kári Simonsen og Henry Berg.

Andrass var skjótastur at skifta, og fór tí fyrstur út á súkkluteinum. Gunnar leyp á súkkluna góðan minutt seinni, og honum á baki Evald, umleið hálvan minutt aftan fyri Gunnar. Síðani komu Eli, Kári og Henry við góðum hálvum minutti ímillum. Gunnar, sum var flúgvandi, fekk tó skjótt fatur á Andrassi, og helt hann støðuna, hóast Andrass rann eitt vet betri.

Evald lá leingi á triðjaplássinum. Hann megnaði at halda Eli aftan fyri seg allan súkkluteinin, men Eli var tann treystari at renna og fór framum og vann sær triðjaplássið á øðrum renniumfari.

Kári Simonsen, sum fyri trimum vikum síðani parkeraði Evald og Kjartan í fjallasúkklukappingini, kom ikki rættiliga fyri seg fyrr enn í renningini, men ov seint var, og hann kom tí á mál sum fimti maður. Henry Berg, sum kom seinastur á mál, var við fyri fyrstu ferð. Hann svam  rættiliga væl, men tá súkklingin og renningin komu fyri, sannaði hann tað sum fleiri undan honum hava gjørt, at triathlon er ein ítrótt, har skift verður millum ítróttagreinar, og tað skal upplivast og lærast.

Marin Heinesen var einasta kvinnan í kappingini. Svimjingin gekk ikki so væl, meðan súkklingin og renningin gingu gingu sum ætlað, hóast hon stríddist við ein snudd hon fekk í kapping í aðrari ítróttagrein. Marin hevur, eins og Henry, fingið sær nýggja súkklu, so tey fara vit vónandi at síggja nógv til í triathlon og súkklukappingum í framtíðini.Tveir ungir dreingir spurdu undan kappingini, um teir ikki kundu royna seg á einum styttri teini. Hetta lat FTF ikki sær siga tvær ferðir, tí hetta er nakað teir hava bíða eftir. Jóannis Albert Nielsen og Tórbjørn Haraldsen skuldi kappast á teininum sum nýbyrjarar brúka. Svmjingin er 300 m, súkklingin 10 km og renningin 3 km, ein avbjóðing sum teir fóru undir við lív og sál. Tórbjørn var heldur stinnari í svimjingini, meðan Jóannis skifti skjótari. Á súkkluteininum var tað so aftur Tórbjørn, ið vann. Og tá komið var til renningina var tað so aftur Jóannis. Stutt sagt ein triathlonkapping sum hon eigur at vera tá hon er best. Triathlonfelagið avgjørdi aftaná kappingini at kappast um føroyameistaraheitið fyri nýbyrjarar á hesum teininum, tá skipað verður á OL-teininum 16 mai. 

Sambært kalendarinum skal einkultstartur koyrast á Sandoynni leygardagin, men vegna ivasamt veður og tað, at fyrsta venjingin fyri úrvælsítróttarfólk verður komandi vikuskifti, er avgjørt, at einkultstarturin verður fluttur. Kunnað verður um hetta skjótast tilber nær koyrt verður ístaðin. Hetta verður gjørt í samráð við Sverri M. Edvinsson, ið er fyrireikari av hesari kappingini.

Komandi sunnudag, sunnudagin 18. apríl, verður kappast um føroyameistaraheitið í Sprint triathlon. Kappingin verður í Havn og byrjar kl. 13.00!

Tá kappast verður í Sprint Triathlon verður fyrst svomið 750 metrar, síðan verður súkklað 20 kilometrar og at enda runnið 5 kilometrar.

Súkklað verður millum rundkoyringina við R.C. Effersøesgøtu og rundkoyringina við Skansan. Koyrt verður framvið strond og teinurin verður koyrdur tríggjar ferðir. Runnið verður á økinum við Plantusøluna. Teinurin er uml. 1 km langur, og verður runnin seks ferðir.

Duathlon kappingin, ið eftir ætlan skuldi verða 4. apríl, er flutt til mánadagin 5. apríl.

Hesa ferð verður svomið og súkklað. Fyrst verður svomið 1000 m og síðan súkklað uml. 45 km, ella runt oyggjarvegin.

Byrjað verður kl. 13.00. Súkklarar eru eisini vælkomnir at luttaka og royna seg á einum 45 km langum fjallaeinkultstarti.

Aðalfundurin hjá Føroya Triathlon Felag verður leygardagin 20. mars kl. 16.00.

Fundurin verður hildin í Eysturskúlanum. Inngongdin við Djóna í Geilsgøtu verður opin.

Fundur sambært lógum felagsins.

Vinarliga vegna FTF

Gunnar Dahl-Olsen, formaður